يا حاج عثمان.. النتيجة قطعية ومفيهاش أي نسبة خطأ، المعمل عاد الفحص مرتين للتأكيد بناءً على طلبكم.
أبويا صوته طلع مبحوح ومكتوم، كأنه طالع من سرداب مظلم، وقال وهو بيشاور بصباعه اللي بيرجف على اسمي:
إنت… إنت متأكد يا دكتور؟ الورقة دي فيها غلط، أكيد العينات اتبدلت في المعمل! إنت عارف ده معناه إيه؟!
الدكتور هز راسه بأسف ونفى بهدوء:
يا فندم التحاليل دي بتتسجل بباركود وبصمة وشهادة إثبات شخصية، الخطأ البشري فيها معډوم تقريباً. إحنا معمل دولي، ومش أول مرة يمر علينا حالات زي دي.
أنا مبقتش فاهمة حاجة، الفضول والخوف والألم كلهم اتحولوا لنار قايدة في صدري، رحت مادّة إيدي وخاطفة الورقة من قدام أبويا، وهو حتى مقدرش يمنعني ولا يحرك إيده عشان يمسكها.
بصيت في التقرير، عيني نزلت بسرعة على نسب التطابق الجيني بين الأطراف التلاتة بيني أنا ومريم… وبين عثمان… النتيجة تطابق بنسبة 99.9 إثبات الأبوة البيولوجية الكاملة.
النسب ضرب في نافوخي للحظة… أنا بنته؟! أنا بنته بجد؟! صرخة مكتومة وقفت في زوري، كنت عايزة أقوم أهزّه من كتافه وأصرخ في وشه بكل سنين الإساءة:
أنا بنتك يا ظالم! بنتك اللي حرمتها من حنانك وشككت في شرف أمها وضايقتها في كل لقمة! بنتك اللي كنت بتقول عليها مش شبهك!
بس قبل ما أفتح بوقي بكلمة، عيني لمحت السطر التاني تحت… السطر اللي قلب الترابيزة، واللي خلّى الدنيا كلها تلف بيا وبأبويا!
السطر التاني كان بيتكلم عن العلاقة الجينية بيني وبين أمي سعاد… النتيجة كانت مكتوبة بخط تقيل وواضح ومحفور في نص الصفحة: عدم وجود أي صلة قرابة بيولوجية بين مريم وسعاد، نسبة التطابق الجيني 0!
وقفت مسمرة في مكاني. الورقة وقعت من بين إيديا على حرف المكتب. عقلي مش قادر يجمع الكلمات.
.. يعني إيه؟! أنا بنت عثمان… من لحمه ونسبه، الراجل اللي بيكرهني وبيتهمني بالإساءة طول 28 سنة هو أبويا الحقيقي! لكن سعاد… الست الحنينة اللي شالتني وسهرت عليا، اللي كانت بتعيط في حضني وبتدافع عني بدموعها، الست الوحيدة اللي حستني بنتها… طلعت مش أمي أصلاً؟! ولا نقطة نسب واحدة بتربطني بيها!
أبويا حط إيديه الاتنين على راسه، وبدأ ينهج بصوت عالي، وشه اتحول للون الرمادي وعينيه جحظت بطريقة مرعبة، وبقى يتمتم بكلام مش مفهوم:
مش ممكن… لا لا.. ده مستحيل.. سعاد؟! إزاي؟! إنتِ بنتي أنا؟ ومين أمك؟! سعاد ولدت في المستشفى قدام عيني.. أنا اللي استلمتك بإيدي!
قام وقف فجأة، الكرسي اتقلب وراه على الأرض بصوت دبة خلت الدكتور يتفزع. أبويا مكانش شايف الدكتور ولا شايفني، كان باصص في الفراغ كأنه بيشوف شياطين، وفجأة صرخ بأعلى صوته في نص العيادة:
الحية!! الخبيثة!! عملتِ فيا إيه يا سعاد؟!!
خرج يندفع من باب المعمل بسرعة كبيرة، بيعرج في مشيته من هول الصدمة، كأن جلطة ماسكة في رجله. أنا جسمي كان متلج، مكنتش قادرة أتحرك، الدكتور مد إيده يديني كباية مية وهو بيقول لي بقلق:
يا بنتي.. اشربي.. واهدي.. الحقيقة ساعات بتكون قاسية، بس لازم تفهمي وتواجهوا بعض بالعقل.
أخدت نفسي بصعوبة، خطفت التقرير في شنطتي، وجريت ورا أبويا. لقيته واقف قدام الأسانسير، عروق رقبته ناطرة برة جلده، وعينيه حمرة زي الجمر. لما شافني، بص لي بنظرة عمري ما شوفتها فيه، نظرة كانت خليط بين الخوف، والذنب، والضياع. مد إيده ناحيتي كأنه عايز يلمسني، كأنه لأول مرة بعد 28 سنة شايفني بنته اللي من صلبه، وقال بصوت متكسر:
مريم… إنتِ… إنتِ حتة مني بجد؟
رجعت خطوة لورا بقرف وألم، ونزلت دموعي وأنا بهز راسي وبقول له:
إوعى تلمسني! دلوقتي بقيت بنتك؟! بعد 28 سنة إساءة وضغط وتشكيك وشك؟! بعد ما خليتني أحس إني غلطة في الدنيا وعالة عليك؟! امشي يا عثمان.. امشي عشان البيت ده فيه حساب كبير لازم يتفتح!
نزلنا، ركب العربية وساق بسرعة كبيرة وتهور عمره ما عمله، كان بيكسر الإشارات ويضغط على البنزين لآخره وهو بيضرب الدريكسيون بإيديه وبيشتم بصوت عالي ويبكي بحالة انفعالية. طول السنين دي كان مفكر نفسه هو الضحية والمخدوع، والنهارده اكتشف إنه كان عايش في كدبة هو نفسه مش فاهم أولها من آخرها.
وصلنا العمارة في مصر الجديدة، طلع السلالم جري كأنه شاب عنده عشرين سنة، ومستناش حتى الأسانسير. طلع المفاتيح بإيد بتترعش، فتح الباب ورزعه في الحيطة بقوة هزت الشقة كلها.
البيت كان هادي بشكل مريب… ريحة البخور اللي أمي متعودة تولعه كل جمعة كانت مالية الصالة. كانت قاعدة على الكنبة القديمة، لابسة إسدال الصلاة، وفي إيدها سبحتها. أول ما الباب اترزع، رفعت راسها بهدوء غريب، هدوء ست كانت مستنية اللحظة دي من سنين طويلة وعارفة إنها جاية لا محالة. ملامحها كانت خالية من أي خوف، بس عينيها كانت غرقانة حزن ومرارة.
أبويا هجم عليها بسرعة، مسكها من كتف الإسدال ووقفها وهو بيهزها بعنف:
انطقيييي!! مريم طلعت بنتي أنااا!! بنتي أنا يا ظالمة! بس طلعت مش بنتك إنتِ!! إنتِ مين؟! وديتي بنتي الحقيقية فين؟! ومريم دي جبتيها منين؟ ومين أمهاااا؟!
سعاد ما صرختش، وما حاولت تدافع عن نفسها ولا حتى تشيل إيده، فضلت باصة في عينيه بكل برود، وابتسمت ابتسامة باهتة تقطع القلب، وقالت بصوت هادي زي السكينة:
أخيرًا يا عثمان؟ أخيرًا ارتحت وعرفت إن شرفك سليم؟
انطقييي يا ولية بدل ما أقتلك هنا وأډفنك مكانك!!
صوت أبويا كان بيزلزل حيطان الشقة.
أنا وقفت في نص الصالة، رجلي مش شيلاني، حاسة إني في كابوس، صوتي طلع بالعافية بيترجى:
ماما… علشان خاطري ردي عليه… قولي له إن الورقة دي غلط… قولي لي إنك أمي اللي ولدتني!
سعاد سابت عينيها تيجي في عيني، ودموعها نزلت بصمت ألم، وقالت بنبرة خلت جسم أبويا يتجمد:
مريم بنتك من صلبك يا عثمان… وأمها مش غريبة عنك ولا عني… بس السؤال اللي لازم تسأله لنفسك مش أنا عملت كده ليه… السؤال هو إنت عملت إيه زمان في البنت الغلبانة اللي كانت شغالة في مكتبك وسافرت فجأة واختفت من 28 سنة؟!
أول ما نطقت الجملة دي، إيد أبويا سابت كتفها وفلتت في الهوا، ورجع لورا خطوتين كأنه اتضرب بضربة في قلبه، وشه اتقلب أزرق والخرس نزل على لسانه!
السكوت اللي نزل على الصالة في اللحظة دي كان أتقل من جبال الدنيا كلها. صوت دقات الساعة المعلقة على الحيطة فجأة بقى يدب في وداني زي المطارق، تك… تك… تك.
أبويا كان واقف مصلوب، عينيه مبرقة في الفراغ كأنه شاف حاجة طلعت له من شقوق البلاط. إيديه الاتنين اللي كانوا من ثانية واحدة بيهزوا في كتف أمي نزلوا جنبه ميتين، ورجليه رجعت ترجع لورا ببطء كأن الأرض بتميد بيه، لحد ما ضهره خبط في ترابيزة الصالون المدهبة والتحف اللي عليها اتهزت وطلعت رنة خفيفة خوّفتنا إحنا التلاتة.
سعاد كانت واقفة ثابتة، الإسدال لافف جسمها النحيل، مفيش فيها أي رعشة، بس عينيها… عينيها كانت بتحاكمه بنظرة ست شالت همّ بلد على كتافها سنين طويلة وساكتة بمزاجها، مش بضعفها.
أنا كنت واقفة بينهم، ركبي بتخبط في بعض، ودماغي كانت بتغلي بنار. يعني إيه البنت الغلبانة اللي كانت شغالة في مكتبك؟! يعني إيه اختفت من 28 سنة؟!
قربت من أمي… أو الست اللي عشت عمري كله فاكراها أمي، وصوتي طلع مقهور، مشروخ، طالع من لحم صدري:
ماما… إنتِ بتقولي إيه؟! سكرتيرة مين وبنت مين؟! ردي عليا يا ماما متسكتيش كده! أنا مالي ومال مكتبه؟! هو إنتِ مش أمي بجد؟! طب وأنا مين؟! أنا جيت الدنيا دي إزاي؟! انطقي بالله عليكي عقلي هيشت مني!
سعاد بصت لي، وشها اللي كان جامد وصارم قدام أبويا اتكسر فجأة في ثانية لما شافت دموعي. حنان الدنيا كله اللي عشت فيه 28 سنة رجع طفح في عينيها. مدت إيدها بتردد ومسحت دمعة نازلة على خدي بصوابعها الخشنة من غسيل وشغل البيت، وقالت بنبرة حنينة مقطعة:
إنتِ بنتي يا مريم… بنتي اللي ربيتها على كبر وشيلتها لحم أحمر على إيدي، بنتي اللي كنت بصحى بالليل أتحسس نَفَسها عشان أطمن إنها لسة عايشة… النسب عمره ما عمل أم يا بنتي، التربية والسهر والدموع هي اللي بتعمل، لكن الحقيقة مكتوب لها تبان، ومفيش سر بيفضل مدفون تحت التراب للأبد.
أبويا فجأة طلع منه صوت غريب، شهقة مكتومة كأنه بيغرق، ومسك رقبته بياقة قميصه المفتوحة كأنه مش لاقي أكسجين في الشقة، وصرخ بصوت مبحوح متشنج:
أحلام؟! إنتِ قصدك… أحلام؟! لا… لا مستحيل! أحلام نزلت العيل ورحلت بعد العملية… الدكتور أكد لي إنها أجهضت ومستحملتش النزيف في المستوصف! إنتِ كدابة يا سعاد! إنتِ بتلعبي بيا عشان تداري على عملك السوداء!
سعاد ضحكت، ضحكة سخرية مرة، طالعة من قاع مرارتها، وقالت له:
