روايات وقصص

ابن عمي من ذوي الهمم

البارت الأول

خليت ابن عمي من ذوي الهمم يكره اختي بعد ما كان روحه فيها لاني عرفت انه هيورث ملايين، وعملت كل جهدي واتجوزته انا ، بس لما صحيت تاني يوم الفرح لقيته بيعمل مشكلة مفيش عقل يتصورها ورجليا مكانتش شيلاني من اللي شيفاه قدامي واتمنيت لو سبته يتجوز اختي ولا وقعت في الورطة دي !!!!

علا أختي كانت مخطوبة لابن عمنا مؤمن. مؤمن ده مكنش زي أي شاب؛ كان من ذوي الهمم، وتصرفاته زي الأطفال الصغيرين، عقله مكنش بيكبر. مؤمن كان متعلق في علا وروحه فيها. كان بيعتبرها مش خطيبته وبس، دي كانت بالنسبة له أمه وكل دنيته. وهي الصراحة كانت رحيمة جداً بيه، ومخطوباله بمزاجها عشان تراعيه وتكسب فيه ثواب.

أنا وقتها مكنش هاممني الهبل ده كله، وكنت بشوفها بتضيع شبابها مع واحد زي ده. قعدت انصحها كتير وقلتلها يا بنتي دي مش جوزة، دا ظلم للنفس!، بس هي معبرتنيش ولا كأنها سامعة حاجة، فسبتها على راحتها.. لحد ما عمي رحل، وهنا الصدمة اللي غيرت مجرى حياتنا كلنا.

عمنا الله يرحمه طلع ساب وراه ثروة وملايين محدش كان يعرف عنها حاجة! ومكنش قايل عليها لحد لأنه كان عايز اللي تتجوز ابنه تكون عشانه هو بشخصه، مش عشان فلوسه. ولقيناه سايب الملايين دي كلها لابنه مؤمن تحت وصاية أمه.

وقتها.. كل خطتي اتغيرت في ثانية بدأت أروح عند مؤمن البيت وأقعد معاه زي ما علا بتعمل، بس هو في الأول مكنش قابلني أبدا وكان بيكش مني. لحد ما جاتني فكرة ماكرة؛ بدأت أزن في ودنه وأفهمه إني جاية عشانه وخايفة عليه، وإني جاية أوعيه، وقولتله إن علا بتكرهه ومستنية تتجوزه عشان تعاقبه كل يوم، وتبهدله، وتخليه يخدمها ويعمل شغل البيت.

في الأول مشاني ومكانش مصدقني خالص، بس أنا مابطلتش. بعد كام يوم روحتله وشغلتله فيديو مزيف أنا عملاه بالذكاء الاصطناعي لصوت وصورة علا، وهي بتقول فيه إنها مستنية تتجوزه عشان تعاقبه وتخليه يخدمها، وبتضحك فيه بطريقة تقلق.

مؤمن بقى يبكي وصدق الكدبة جداً! ومع إن الفيديو كان واضح إنه مزيف وفيه لعب، بس هو عشان عقله طفل مكانش فاهم أي حاجة خالص، وصدق كل حرف.

من بعدها، بقى يقلق من علا ويرفض يكلمها أو يقابلها تماماً، وكل ما يشوفها يقعد يصوت ويقول شريرة.. شريرة!، وأمه بقت تبعد علا عنه عشان ميزعلش ولا يتعب، وأنا بقيت أروحله كل يوم، أجبله لعب وأكل وحاجات حلوة لحد ما اتعود عليا وبقى يستناني.

وجا اليوم اللي غير كل حاجة؛ مؤمن دخل مع امه وقاله انهم عايزينه يتجوزني انا.. مش علا!. أختي علا بكت وانهارت يومها بشكل يقطع القلب. والصراحة، في الوقت ده، كانت مضحكاني جداً! كنت مستغربة إزاي زعلانه أوي كده على واحد بسيط بالشكل ده! دي أي واحدة غيرها كانت تقول الحمد لله إنها خلصت منه ومن مسؤوليته، خصوصاً وإني عارفة أختي كويس وعارفة إن موضوع الفلوس ده أصلا عمره ما كان في بالها ولا همها مليم واحد. فكرة إنها زعلانة عشان بتحبه لشخصه كانت بالنسبة لي حاجة عبثية وبتضحكني قوي.

وعدى وقت قصير جداً.. قصير لدرجة إني مالحقتش أفكر، واتجوزته! دخلنا بالليل، وهو كان قاعد مش فاهم أي حاجة في الدنيا ولا يعرف أصلاً يعني إيه حياة زوجية، بس ده كان آخر همي في اللحظة دي.. انا مكنتش عايزه جواز كنت عايزه أمن نفسي، واضمن قرشين حلوين يخلوني أعيش أميرة، وقولت لنفسي ما هي كده كده جوازة هخلص منها وأطلق منه بعد ما أطمن على مستقبلي وخلاص!.

وكنت نايمة بالليل وكل حاجة في دماغي زي الفل. لحد ما صحيت تاني يوم الصبح بدري على مشكلة هدت حيلي ومستحيل عقل بشري يتصورها! المنظر اللي شفته ولقيت مؤمن بيعمله في الأوضة قدامي.. خلى برجليا مش شايلاني من الصدمه و تمنيت لو كنت سيبت مؤمن لاختي علا.. تتوكس بفلوسه، وتتزفت بكل حاجة، ولا إني وقعت في الورطة دي اللي مش عارفة هطلع منها إزاي!!!!!

كنت واقفة مكاني ومش قادرة أصرخ حتى، عيني مفتوحة على آخرها، ومخي مش مستوعب اللي بيحصل قدامي! مؤمن كان قاعد على الأرض، وحواليه كل اللعب اللي أنا كنت جايباهاله، وكان ماسك صورتي وصورة علا اللي كانت في ألبوم الخطوبة. كان جايب مقص وقاعد يقص في صورتي أنا، وكل ما يقص حتة يرميها ويقول بصوت عالي: وحشة… وحشة يا ماما… دي وحشة وبتكدب!

قربت منه وأنا مش فاهمة هو بيعمل إيه، لقيته رافع راسه وباصصلي، وفجأة رمى المقص وجري على الدولاب وفتحه، وطلع منه هدومي وبدأ يرميها بره الأوضة وهو بيصرخ: امشي… مش عايزك… إنتي كدابة!

حاولت أهدّيه وقلتله مؤمن يا حبيبي، مالك بس؟ أنا مراتك، أنا سوسن! لكنه حط إيده على ودانه وفضل يصرخ: مش عايز سوسن… عايز علا… هاتولي علا! وقتها حسيت إن في حاجة غلط، وإن الموضوع مش مجرد زعل عادي. قربت منه تاني، لكنه مسك مخدة ورماها ناحيتي، وبعدها جري ناحية الباب وفضل يخبط عليه بإيده.

دخلت أمه على الصوت، وكانت لسه صاحية، وأول ما شافت الهدوم المرمية ومؤمن بالحالة دي صرخت: في إيه يا مؤمن؟ مالك يا حبيبي؟

جري عليها وحضنها وفضل يعيط: يا ماما أنا عايز علا… سوسن وحشة… سوسن بتكدب! أمه بصتلي باستغراب وقالت: هو حصل إيه من الصبح؟ ده كان نايم كويس امبارح! قولتلها وأنا بحاول أتماسك: مش عارفة، صحيت لقيته كده، يمكن تعبان شوية.

لكن مؤمن رفع راسه من حضن أمه وقال: أنا سمعتها يا ماما… كانت بتقول إنها هتخليني أعمل كل حاجة، وإنها مش بتحبني! ساعتها قلبي وقع في رجلي. أمه بصتلي وقالت: إنتي قلتي له حاجة يا سوسن؟ رديت بسرعة: لا طبعاً! هو أكيد افتكر حلم أو حاجة.

لكن مؤمن جري على الكومودينو، وطلع الموبايل بتاعه، وفتح فيديو واداه لأمه. كان الفيديو اللي أنا عملته لعلا! أمه فضلت تتفرج، وكل شوية ملامحها تتغير، ولما خلص قالتلي بصوت هادي لكنه مليان غضب: إيه ده يا سوسن؟

حاولت أخطف الموبايل من إيدها وقلت: ده فيديو قديم، وأنا معرفش هو جابه منين! لكنها رجعت الموبايل وراها وقالت: قديم إيه؟ دي علا! إنتي عايزة تقنعيني إن بنتي أختك قالت الكلام ده؟ قلت بتوتر: يمكن حد باعتله الفيديو، أنا ماليش دعوة!

مؤمن كان واقف جنب أمه وبيعيط، وفجأة قال: سوسن هي اللي قالتلي إن علا شريرة… سوسن قالتلي أقلق منها! حسيت إن الأرض بتلف بيا. أمه سكتت شوية، وبعدين قالت: اطلعي بره يا سوسن، أنا هاخد ابني للدكتور. اتعصبت وقلت: إزاي يعني أطلع بره؟ ده جوزي وبيتي! ردت عليا: البيت ده بيت ابني، وإنتي لسه مش فاهمة إنك ظلمتيه؟!

الكلمة وجعتني، بس اللي وجعني أكتر إني لأول مرة أحس إن الفلوس اللي كنت بجري وراها ممكن تضيع من إيدي. لبست بسرعة ونزلت عند أمي، ولما حكيتلها اللي حصل، قالتلي: يا بنتي اهدي، دي نوبة وهتعدي، ومؤمن هينسى. بس أنا كنت عارفة إن الموضوع أكبر من كده.

بعد ساعتين عرفت إن أمه أخدته لدكتور متخصص كان بيتابع حالته من سنين، وإن الدكتور طلب يشوف الفيديو ويسمع منه كل اللي حصل من بداية الخلاف مع علا. وبالليل، أمه كلمتني وقالتلي أروح لها.

روحت وأنا مجهزة كلام كتير، لكن أول ما دخلت لقيت علا قاعدة في الصالون! أختي اللي أنا حرمتها من الإنسان الوحيد اللي كانت بتحبه، واللي فضلت أضحك عليها لما كانت بتعيط يوم ما مؤمن رفضها. كانت عينيها حمرا من العياط، لكنها أول ما شافتني قامت وقفت. قالتلي: إنتي عملتي فيه إيه يا سوسن؟

حاولت أهرب من عينيها وقلت: أنا معملتش حاجة، هو اللي مش عايزك وخلاص. علا قربت مني وقالت: أنا مش جاية أتكلم عن نفسي، أنا جاية عشان مؤمن. الدكتور قال إنك استغلّيتي حالته وإنك لعبتي في عقله وقلقتيه من الناس اللي بيحبهم. رديت بعصبية: وإنتي مالك؟ خلاص هو اتجوزني!

السابق1 من 2
تابع المقال

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

زر الذهاب إلى الأعلى