وقف قدام أبوه، المستشار عبد الحميد الشناوي، وقدام والدته اللي كانت لابسة ألماظ وفستان سواريه فاخر، وبص لوالده وقال:
فاكر يا بابا من سنة ونص، لما شركتنا للمقاولات اتعرضت لأزمة السيولة الكبيرة، والشيكات كانت هتودينا في مشكلة كبيرة والبنك كان هيحجز على بيتنا وأملاكنا؟ فاكر لما قولتلك إن خطيبتي منى جابتلي شيك بنكي مقبول الدفع بمليون وسبعمية ألف جنيه، وقالتلي إن ده ورث أبوها الراحل اللي كان متجمد في بنك استثماري، وإنها بتفديني بيه وبتنقذ اسم عيلتنا؟
والد أحمد اتعدل في قعدته، وبص لمنى ووشه اتغير:
أيوة طبعاً يا ابني.. ومن يومها وإحنا شايلين لمنى الجميل ده، وقولنا دي بنت أصول وتستاهل كل خير ووافقت على كل طلباتها في الشبكة والفرح!
أحمد ابتسم بمرارة، ورفع الورقة اللي في إيده قدام وش أبوه، وقدام المعازيم:
الورقة دي يا بابا مش حجة ورث، ولا شيك من شركة استثمار! الورقة دي عقد بيع نهائي لبيت متواضع في السيدة زينب، ووصل استرداد كمبيالات من تاجر قماش.. البيت الوحيد اللي كانت حيلتها الست سعاد دي! الست اللي منى خبتها في المطبخ النهاردة عشان لبسها البسيط ما يعرّهاش!
عيني وسعت.. وحسيت كأن أثر قلبي اتصفى في ثانية واحدة!
البيت؟! بيتي الصغير في السيدة زينب.. السقف اللي كان ساترني بعد غياب أبوها.. البيت اللي منى جاتلي من سنة پتبكي بالدموع وتقولي يا ماما لو ممضيتيش على بيعه مش هعرف أتجوز أحمد، أهله طالبين مني أجهز شقة فخمة وأدفع نص تمنها عشان يقبلوا بيا، ولو مبعتيش البيت مش هعرف أكمل ومش هتجوز طول عمري؟!
أحمد كمل وصوته بيتهز بالقهر:
منى أخدت فلوس بيع بيت أمها، وقدمتهالي في صورة شيك ورث عشان تكبر في عين أهلي، وخلتني أكتب مؤخر صداق وقايمة بالملايين على أساس إنها شريكة في مالي! وأمها.. أمها اللي باعت سقف بيتها عشان تفرح بنتها، راحت سكنت في أوضة وصالة فوق سطوح في حي شعبي، واشتغلت في مطاعم عشان تسدد بقية الأقساط اللي منى مكملتهاش!
القاعة كلها اتقلبت همس وزعيق ونظرات احتقار!
خالات أحمد وعماته اللي كانوا بيبصوا لمنى بإعجاب، اتراجعوا خطوتين لورا وعيونهم مليانة قرف من الجحود اللي سمعوه.
والدة أحمد قامت وقفت، وقربت مني.. الست الهانم اللي منى كانت خايفة من نظرتها.. مدت إيديها الاتنين ومسكت كفي الخشن ودموعها في عينيها:
إنتِ اللي عملتي كده يا أمي؟! إنتِ اللي أنقذتي ابني وبيتنا من الخراب، واحنا مفكرين إن بنتك هي صاحبة الفضل؟! حقك علينا.. والله العظيم حقك على راسي من فوق!
منى انهارت تماماً، قعدت على ركبتها على مسرح الكوشة، والفستان الأبيض اتفرش على الأرض، وبدأت تصرخ بهستيريا:
أنا عملت كده عشانك يا أحمد! عشان أبان في مستواك! عشان ميعايرونيش إني بنت بياعة وأبويا كان موظف غلبان! أنا كنت عايزة أرفع راسنا قدامكم!
أحمد وطى لمستواها، قلع دبلته الدهب من صباعه ورماها في حجرها وهي پتبكي:
ترفعي راسنا بالكدب يا منى؟! تنكري أمك وتخليها تخدم في المطبخ عشان ترفعي راسك؟! الأم اللي تبيع سقف بيتها عشانك، تاج على راس أي راجل محترم يدخل بيتها حافي.. الست دي شرف لأي عيلة، بس إنتِ اللي طلعتي رخيصة ومبتعرفيش يعني إيه أصل!
بص أحمد لوالده وقال بنبرة مفيهاش رجعة:
الفرح ده خلص يا بابا.. والمأذون اللي قاعد برة هيكتب ورقة الطلاق قبل ما الفجر يطلع. اللي تنكر أمها اللي ربتها وتدوس على كرامتها عشان تتباهى قدام الناس، مستحيل تكون أم لعيالي ولا تأتمن على شرفي وبيتي!
منى مسكت في رجل أحمد بتترجاه وتصرخ:
أحمد لأ! عشان خاطر ربنا متفضحنيش! متطلقنيش ليلة فرحي! أنا هبوس رجل ماما قدامكم كلكم!
لفت ناحيتي وزحفت على ركبتها، مدت إيدها تمسك طرف عبايتي البسيطة:
ماما! قولي له حاجة يا ماما! قولي له إنك مسامحاني.. أنا بنتك الوحيدة! ماليش غيرك يا ماما!
فضلت باصة لبنتي..
بنتي اللي شيلتها تسع شهور في بطني..
اللي كنت بسهر جنبها في الليالي الباردة لما تسخن، وأكمد جبينها بدموعي..
اللي كنت بروح الشغل بجزمة مقطوعة في عز الشتا عشان أجيبلها الكتب واللبس اللي كانت بتطلبه عشان متكونش أقل من صاحباتها..
بصيت لها ودموعي نزلت.. بس المرة دي مكانتش دموع ضعف.. كانت دموع أم شافت بنتها بتجرحها بجرح قاسي، وبتبيعها عشان مظاهر فارغة.
مديت إيدي وسحبت طرف عبايتي من بين صوابعها بهدوء، وقلت بصوت حزين بس قاطع زي السيف:
أنا مبعتش بيتي عشان تذليني قدام الناس يا منى.. أنا بعت بيتي عشان كنت فاكراكي هتشتري بيه راجل يصونك ويصون كرامتنا. بس إنتِ اشتريتي بيه الكدب والغرور، والكدب عمره ما بنى بيت. أنا مسمحاكي لوجه الله، بس الألم اللي سيبتيه في قلبي النهاردة وإنتِ بتقولي دي واحدة بتساعد في التنظيم.. مفيش اعتذار في الدنيا هيداويه.
المعازيم انسحبوا من القاعة في صمت وخزي، والموسيقى وقفت، والقاعة الفخمة اللي كانت مليانة ضحك وزينة اتحولت لجو حزين لجحود الأبناء.
أحمد جه ووقف جنبي، قلع جاكت بدلته وحطه على كتافي بالراحة عشان يدفيني من تكييف القاعة، وبصلي باحترام عمري ما شفته:
حقك هيرجع يا أمي.. والبيت اللي في السيدة زينب أنا اشتريته من الراجل من أسبوع ورجعته باسمك، وورقة طلاق منى هتوصلها مع كامل مؤخرها عشان ميبقاش ليكي ولا ليها فضل علينا في مليم واحد.. ومن النهاردة، إنتِ أمي وأنا ابنك اللي هيفضل يشيلك فوق راسه.
خرجت من القاعة وأنا ساندة على دراع أحمد ووالده، رافعة راسي في السما بعد ما الحق ظهر قدام الخلائق كلها.
منى فضلت قاعدة لوحدها على أرض الكوشة المظلمة، بالفستان الأبيض اللي اتلطخ بدموع الندم والحسرة، تدوق طعم الوحدة والخزي بعد ما باعت أغلى ما تملك في الدنيا عشان شوية مظاهر كدابة.
وعرفت في اللحظة دي إن بر الوالدين مش كلمة بتتقال، ده دين ودنيا.. وإن اللي يدوس على إيد أمه عشان يوصل لفوق، بيجي عليه يوم بيقع من فوق لتحت، ومبيلاقيش حتى التراب اللي يسنده!
تمت
