رنت فوزية على أحمد، والخط قعد يرن لحد ما فتح
ألو، إيه يا ماما؟ في حاجة؟ أنا لسه مخلص شغل في الموقع وطالع على الأوتيل.
حماتي صرخت في التليفون
أحمد! الحقني يا ابني! حماك واقف قدامي في مدخل الشقة، وجايب ورق بيقول إن الشقة مش بتاعتك ولا باسمك، وإنك ما دفعتش فيها جنيه، والراجل بيقول إنه مسلفك نص مليون جنيه كمان! قوله يا أحمد إن الشقة دي شقتك وإنك دافع تمنها، قوله عشان بيكدبوني في وشي!
السماعة سكتت بقلم حكايات منال علي
الصمت اللي جه من ناحية أحمد كان كفيل يجاوب على كل حاجة. صوت أنفاسه السريعة والمكتومة كان واضح جدًا في الاسبيكر.
حماتي صوتها اتكسر
أحمد؟ رد عليا يا حبيبي ساكت ليه؟
أحمد اتكلم أخيرًا، وصوته كان مليان خزي ورعب
ماما أنتِ فين بالظبط؟ أنتِ رحتي شقة الهرم ليه؟ أنا مش قايلك بلاش تروحي هناك وأنا مش موجود؟!
حماتي صرخت
سيبك من أنا رحت ليه! رد عليا وقول للراجل ده إن الشقة شقتنا وبفلوسك!
أحمد قال بنبرة ذليلة ومكسورة
يا ماما الشقة مش شقتي الشقة ملك عمي عماد من أول يوم أنا أنا كدبت عليكي عشان كنت مكسوف أقولك إني متجوز في شقة حمايا وما دفعتش فيها حاجة وعمي عماد هو اللي سترني ارجوكي يا ماما اقفلي وماتعمليش مشاكل!
الموبايل وقع من إيد حماتي على الأرض، وصوت أحمد كان لسه طالع من الاسبيكر وهو بينادي ماما؟ ماما ردي عليا!
عم جابر البواب هز راسه بأسف، وأنا حسيت بغصة في قلبي، غصة وجع على الخمس سنين اللي عشتهم مع راجل ضعيف وكداب، كان سايب أمه تأذيني كل يوم بأسلوب بارد عشان يداري نقصه وخيبته ورا ضهري.
بابا وطّى على الأرض، جاب شنطة من شنطي اللي مرمية، ونفضها بإيده، وبعدين وقف وبص لحماتي وقال بهدوء شديد
شفتي ابنك؟ شفتي الراجل اللي جاية تتحدي بيه وتطردي بنتي من بيتها عشانه؟
حماتي كانت واقفة ضامّة كفوف إيدها، عينيها مثبتة في الأرض، والهيبة الكدابة اللي كانت داخلة بيها اتفركشت تمامًا، وقالت بصوت واطي ومكسور
أنا أنا مكنتش أعرف يا حاج عماد حقك عليا ده سوء تفاهم
هنا أنا مقدرتش أسكت.
مسحت دموعي بإيدي، وقربت منها خطوتين، وبصيت في عينها مباشرة. دي كانت أول مرة في حياتي أرفع عيني في وشها بالشكل ده.
قلت لها بصوت قوي وثابت
سوء تفاهم يا طنط؟! يعني لو الشقة كانت باسم ابنك بجد، كان من حقك ترمي كرامتي وهدومي في السلم وتقفلي الباب في وشي؟! لو الشقة باسمه، كنتِ تستبيحي تكسريني وتطرديني لمجرد إنك أمه؟! أنتِ ما عملتيش كده عشان مش عارفة الحقيقة أنتِ عملتي كده لأنك مريضة بالسيطرة، وفاكرة إن الجواز معناه إنك تشتري خدامة لابنك تهينيها وقت ما تحبي!
حماتي بصتلي بذهول، مكنتش متوقعة إن نور الهادية الضعيفة اللي كانت بتسكت على كل إهانة تطلع منها القوة دي كلها.
