Uncategorized

جوزي حجز تذاكر

قلبه دق بشدة من الأمل، حط التليفون على أذنه وهو بيتنفس بسرعة:

— “مريم! مريم ردّي عليا أرجوكِ! مريم أنا أسف.. أنا والله العظيم ما كنت أقصـ—”

— “الخط ده تحت الإدارة القانونية لمكتب الأستاذ طاهر يا طارق بيه.”

الصوت ما كانش صوت مريم. كان صوت السكرتيرة التنفيذية لمكتب المحاماة.

— “مدام مريم موبايلها مقفول بأوامر طبية وممنوع عنها أي اتصالات قد تسبب لها إجهاد عصبي. أي محاولة للتواصل المباشر معها أو الاقتراب من مقر إقامتها الحالية أو المستشفى هتُعتبر مضايقة صريحة وهنصدر ضدك أمر بعدم التعرض فوراً. أرجو إن الرسالة تكون وصلت.”

السكرتيرة قفلت الخط قبل ما ينطق بكلمة.

طارق مسك التليفون ورمى بيه في النجيل بغل وحسرة. القوة اللي كانت عنده، الفشخرة اللي كان بيعملها قدام زمايله في الشركة، الكلمة اللي كان بيمشيها على مريم لمجرد إنه فاكر إنها محتاجة له.. كل ده انهار في لحظة. افتكر يوم الجواز، لما مريم قالت له بابتسامة هادية وهي ماسكة إيده: “أنا مش عايزة منك غير إنك تتقي ربنا فيا يا طارق.. الفلوس والظروف بتروح وتيجي، بس الحنية والأصل هما اللي بيبقوا.”

ساعتها طارق افتكر إنها بتقول كده عشان هي فقيرة أو مكسورة الجناح ومالهاش عيلة تنصفها، فساق فيها وعاش دور البطل المعطاء!

— “أنا لازم أروح للمستشفى..” قال طارق وهو بيلف حوالين نفسه. “أنا لازم أشوفها بنفسي. هي أكيد مش هتهون عليها العِشرة.. مريم بتحبني، أنا عارف إنها بتحبني! هي بس زعلانة عشان اللي حصل في القطر.. هروح أعتذر لها وأطلب منها السماح، هي قلبها أبيض وست طيبة وبتسامح!”

فاطمة قامت وقفت وجريت عليه، مسكت في هدومه:

— “أيوة يا طارق! روح لها! استسمحها، اعتذر لها قدام كل الناس، وقولها إن فاطمة أختك كانت غلطانة وأنا مستعدة أروح أبوس رأسها وأخدمها وهي حامل لحد ما تولد! طارق إحنا لو اتفضحنا في العيلة وعمي عرف، وسر الشركة والتجميد ده اتعرف، إحنا هنضيع!”

طلعت فاطمة وطارق بيجروا على بوابة الكمبوند. أفراد الأمن كانوا واقفين بيبصوا لهم بنظرات ساخرة. السائق الخاص اللي كان طارق بيؤمره وينهى عليه ويقوله “جهّز العربية يا حسن” جه وقف قدامه، وبص له بمنتهى البرود:

— “طليق الهانم.. الأستاذ طاهر بلغنا إن مفاتيح العربية الرينج روفر تسلمها فوراً، لأن العربية مسجلة باسم الشركة القابضة المملوكة لوالد مدام مريم، وحضرتك مالكش حق استخدامها بعد النهاردة.”

— “أنت بتكلمني كده إزاي يا جدع أنت؟!” صرخ طارق وهو بيفقد أعصابه. “أنت نسيت نفسك ولا إيه؟!”

الحارس الرئيسي للكمبوند قرب بثبات وحط إيده على كتف طارق بقوة:

— “يا أستاذ طارق، بلاش مشاكل. أستاذ طاهر جابلنا أمر كتابي وإخلاء رسمي. المتعلقات الشخصية بتاعتك أنت وأختك هتتلم في شنط وتتحط برة البوابة الساعة 2 الضهر. لو سمحت سلم المفاتيح واطلع برة الكمبوند بهدوء عشان ما نطلبش النجدة وتعمل لنفسك فضيحة على الفاضي.”

طارق رمى المفاتيح في وش السواق، وجر أخته من إيدها وخرجوا برة الأسوار العالية.

الشمس كانت حارقة، والرصيف كان ناشف ومفيش حتى ظل يقعدوا تحته. طارق وقف على شارع التسعين في التجمع، التاكسيات بتعدي من قدامه وهو مش قادر يستوعب إنه من بضعة أيام كان بيمشي بالعربية الفارهة وبيأمر ويطاع، ودلوقتي واقف على الرصيف مش لاقي مكان يروح فيه!

— “هنروح فين دلوقتي يا طارق؟” فاطمة قعدت على الشنطة الصغيرة اللي كانت معها وبدأت تعيط بانهيار. “الشارع؟ هنقعد في الشارع بالشنط؟!”

— “اسكتي بقى! اسكتي خالص!” زعق طارق وهو بيمسك دماغه. “على حدائق القبة.. هنروح لشقة ماما. هخلي البواب يكسر القفل أو نطرُد الساكن بأي طريقة.. تصرفي معايا تكسي بسرعة.”

تابع المقال

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

شاهد أيضاً
إغلاق
زر الذهاب إلى الأعلى