
أمك المريضة دي ما افتكرتهاش لما استوليت على فلوس خالتك اللي تعبت في جمعها؟ ما افتكرتهاش وأنت بتتنقل من مكان لمكان بأسامي مزيفة وتسبب أذى لناس بريئة؟ القانون هو اللي يحاسبك يا أحمد.
جرس الباب الخارجي رن بقوة.
تامر قام وقام معايا، أخدت نفس عميق وطلعت فتحت الباب.. كان فيه أمين شرطة ومعاه اثنين من الأفراد وضابط مباحث بالزي المدني.
الضابط بص لي وقال:
السلام عليكم.. حضرتك اللي طلبتي النجدة وقلتي إن فيه شخص مطلوب موجود عندك؟
أيوه يا فندم.. اتفضلوا. أحمد ناصر، الشخص المطلوب في قضايا شقق مدينة نصر وقضية خالتو فريدة.. موجود جوة البدروم تحت!
الضابط عيونه اتسعت من المفاجأة:
أحمد ناصر؟ أنتِ متأكدة؟ ده بقالنا سنتين بندور عليه ومختفي تمامًا!
متأكدة مليون في المية يا فندم.. ادخلوا وشوفوه بنفسكم.
نزلنا كلنا للبدروم. الضابط وقف قدام الباب، وأمين الشرطة جهز القيود.
مسكت المفتاح، وحطيته في القفل، ودرته بالبطيء.
تك.
فتحت الباب بالراحة ورجعت لورا.
الأفراد دخلوا فورًا، ولقوا أحمد واقف في زاوية البدروم، وشه أصفر زي الليمونة، وهدومه متبهدلة من التراب، وعينيه مليانة ارتباك وخوف.
الضابط بص له كويس، وبعدين طلع تليفونه وقارن وش أحمد بصورة عنده على الموبايل، وابتسم ابتسامة انتصار:
هو بعينه.. أحمد ناصر، الشهير بأحمد الفونس. أخيرًا وصلت لك يا بطل!
أحمد ما فتحش بوقه بكلمة. طأطأ راسه، وتم تقييده بسرعة.
وهو طالع من البدروم ومعدي من جنب تامر، بص لتامر ونزل عينيه في الأرض من الإحراج.
تامر بص له بنظرة مليانة حسرة ووجع، وقال له بصوت واطي:
خسارة.. كنت فاكرك صاحب بجد.
رد الضابط وهو بيصطحبه للخارج:
أحمد ما يعرفش يعني إيه صحوبية يا ابني.. ده ملفه مليان أشخاص اتعامل معاهم بنفس الطريقة. ياخد ثقة الشباب ويدخل بيوتهم ويستغل طيبتهم ويمشي. الحمد لله إن والدتك كانت صاحية ومفتحة!
طلعت مع الشرطة لحد الشارع، والناس في الشارع كانت واقفة تتفرج ومندهشة من المنظر. أحمد ركب سيارة الشرطة، والضابط طلب مني ومن تامر نروح القسم عشان نسجل أقوالنا ونفتح القضية القديمة تاني.
بعد ساعات طويلة في القسم، ومراجعة المحاضر وإثبات الوقائع، رجعنا البيت.. الساعة كانت عدت نص الليل.
البيت كان هادي أوي. صينية اللحمة بالخضار كانت لسه على الترابيزة، بردت وجمدت الدهون اللي فيها.
تامر قعد على الكنبة في الصالة، وحاطط إيده على وشه.
قعدت جنبه، وحطيت إيدي على كتفه:
الحمد لله يا تامر.. كل حاجة عدت على خير.
تامر رفع راسه وبص لي وعينيه مليانة دموع:
أنا آسف يا ماما.. أنا السبب إني دخلت الشخص ده بيتنا. أنا اللي كنت مش واخد بالي من كدبه.
أنت مش السبب يا حبيبي.. أنت قلبك أبيض وبتحسن الظن بالناس، وده مش عيب فيك، ده عيب في الزمان واللي فيه. بس الدرس ده كان لازم نتعلمه.. مش أي حد نضحك في وشه ندخله بيتنا ونعرفه أسرارنا. البيت ده ليه حرمة، والناس مش كلها بالوشوش اللي بتظهر بيها.
تامر قال:
الحمد لله إنك كنتِ هنا يا ماما.. الحمد لله إنك شجاعة وقدرتي تتصرفي كده من غير ما تخافي.
ابتسمت ومسحت على شعره:
الأم لما تحس إن بيتها وولادها في خطر، بتتحول لأسد يا تامر.. يلا قم غير هدومك، عشان نسخن الأكل ونآكل، وشنا اصفر من كتر التعب!
ضحك تامر من قلبه لأول مرة من الصبح، وقام معايا للمطبخ.
وفي الليلة دي، أكلنا سوا، وأنا حاسة إن روح خالتوه فريدة ارتاحت، وإن ربنا حمانا من مشكلة كبيرة كانت هتدخل بيتنا من أوسع باب.
باب الغفلة.
تمت:
مشيرة محمد




