
الشمس كانت دافية في جنينة بيتنا الجديد.
كنت قاعدة على الكرسي الهزاز، وبنتي “فريدة” نايمة على حجري، لابسة فستان أبيض صغير، وبتضحك في نومها.
سمعت صوت خطوات جاية من ورايا، وبعدها إيدين دافيين اتحطوا على كتفي، وريحة البرفان اللي بحبها ملت المكان.
كريم وطى وباس راسي، وقعد على الكرسي اللي جنبي وهو شايل صينية عليها كوبايتين عصير.
بصلي بابتسامة كلها حب ومشاغبة:
— جاهزة يا عروسة؟
ضحكت من قلبي، وبصيتله باستغراب:
— عروسة إيه تاني يا كريم؟ إحنا مش خلاص رجعنا لبعض وكتبنا الكتاب الأسبوع اللي فات؟
كريم غمزلي وهو بيبص لفريدة اللي صحيت وبتلعب بصوابعها الصغيرة:
— أيوه كتبنا الكتاب… بس ما عملناش فرح! وإنتِ فاكرة إني هنسى إنك رفضتي تيجي فرحي المرة اللي فاتت؟
ضحكت بصوت عالي، وحطيت راسي على كتفه وأنا حاسة إن الدنيا أخيراً ضحكتلي:
— المرة دي هاجي… ومش هقوم من جنبك أبداً.
كريم حضني وحضن بنتنا، وبص للسما الصافية، وعرف إن بعد كل ليل طويل وضلمة… لازم تطلع شمس جديدة، تنور حياتنا من تاني.




