قاعدة على الكنبة وعينيها مليانة دموع.
خير يا حسن؟ إنتِ سيبتي الولاد لوحدهم ليه؟ هما مع أمهم يا حسن، وأنا كنت تعبانة ودخلت أرتاح شوية. يسرا تدخلت بسرعة خلاص يا حسن، متكبرش الموضوع، أنا اللي غلطانة إني طلبت منها تساعدني، واضح إنها مش طايقانا.
بصيتلها وقلت إنتِ طلبتي مني إيه أصلًا؟ ردت وهي بتبص للأرض خلاص يا سعاد، مش لازم نفتح كلام. حسن اتعصب وقال إنتِ هتفضلي تحاسبيها على كل كلمة؟ دي ست أخويا، وأنا مش هقبل إنها تحس إنها غريبة في بيتي.
لكن أكتر موقف استفزني كان يوم الجمعة، لما حسن رجع من السوق ومعاه طلبات كتير، وحطها قدام يسرا وقال شوفي يا ستي، جبتلك كل اللي طلبتيه. فتحت الأكياس وبدأت تطلع منها الحاجات، وبعدها رفعت صوتها وقالت يا حسن، إنت نسيت تجيب الشوكولاتة اللي بحبها!
رد عليها معلش، أنزل أجيبهالك دلوقتي. قالت وهي بتضحك لا خلاص، كفاية إنك تعبت نفسك عشاني. وبعدين لفت ناحيتي وقالت على فكرة يا سعاد، أنا نفسي في محشي النهارده، بس يكون معمول زي ما حسن بيحبه، وإنتِ أكيد عارفة طريقته.
بصيتلها وقلت اعمليه إنتِ، ما إنتِ اللي نفسك فيه. اتغير وشها، وحسن رفع عينه من الموبايل وقال إيه يا سعاد؟ هو طلب صغير صعب عليكي؟ لأ يا حسن، بس أنا مش خدامة عند حد. قام من مكانه وقال بعصبية محدش قال إنك خدامة، بس إنتِ طول عمرك بتعملي الأكل، إيه اللي اتغير؟
قبل ما أرد، يسرا قالت خلاص يا حسن، متضغطش عليها، أنا هعمله بنفسي حتى لو طلع مش حلو. وبالفعل دخلت المطبخ، وبعد شوية سمعتها بتنادي يا سعاد، ممكن تيجي تساعديني؟دخلت لقيتها واقفة جنب الحلة، وأول ما قربت قالت إنتِ حطيتي الملح هنا؟
لأ. غريبة، أصل الأكل طعمه مش مظبوط خالص. وقبل ما أتكلم، خدت الطبق وخرجت لحسن وقالت معلش يا حسن، أنا حاولت أعملك المحشي اللي بتحبه، بس شكلي مش بعرف أعمل حاجة زي سعاد. حسن ضحك وقال ولا يهمك، إنتِ مش مطالبة تعملي حاجة، سعاد تعمل كل حاجة في البيت.
كانت بتبصلي وهي مبتسمة، وكأنها كسبت جولة جديدة. لكن اللي يسرا مكنتش فاهماه إن كل مرة كانت بتحاول تغيظني فيها، كانت بتكشفلي جانب جديد من شخصيتها، وبتخليني أشوف حسن كمان من غير أي رتوش. وفي ليلة، كنت داخلة أوضتي، سمعتها بتتكلم في التليفون، فوقفت لما سمعتها بتقول أيوه يا حبيبتي، متقلقيش، أنا ماشية زي ما أنا عايزة، هو أصلًا بيعمل أي حاجة أطلبها منه.
.. وسعاد دي؟ دي مسألة وقت، يا إما هتزهق وتمشي يا إما هخليها هي اللي تغلط قدامه ويطردها بنفسه. وقفت مكاني وأنا مش مصدقة اللي سمعته، وفضلت مستنية لحد ما قفلت المكالمة، وبعدها دخلت أوضتي من غير ما أحسسها إني سمعتها.
ابتسمت وأنا بقول لنفسي آه يا يسرا، يعني دي خطتك؟ طب كويس أوي، بس واضح إنك نسيتي إن البيت ده مش جديد عليا، وإنك مهما حاولتي تلعبي من ورا ضهري، أنا كمان بعرف ألعب.
ومن اللحظة دي قررت إني مبقاش مجرد واحدة بتتفرج على اللي بيحصل، لأن يسرا بدأت مواجهة، وأنا قررت أسيبها تكمل لحد ما تقع في الغلطة اللي مش هتعرف تصلحها. وفى نفس الوقت سبتهم نايمين عشان افوقهم على اكبر كابوس
ومن اليوم ده قررت أغير طريقتي مع يسرا، بدل ما أدخل معاها في خلافات وأرد على كل كلمة، بقيت أتعامل معاها بمنتهى الهدوء، وأسيبها تعمل اللي هي عايزاه. بقت تطلب مني حاجات وأنا أنفذ من غير نقاش، وتطلب مني أجهز الأكل اللي حسن بيحبه، وأرتب لها أوضتها، وأغسل هدوم ولادها، وكنت بعمل كل ده وأنا ساكتة.
وكل ما حسن يشوفني هادية يقول
أهو كده يا سعاد، أنا كنت عارف
إنك عاقلة وهتفهمي إن وجود يسرا في البيت مش هيضايقك. كنت أبتسم وأرد
طبعًا يا حسن، دي مراتك وليها حق تعيش مرتاحة، وأنا مش هقف في طريق سعادتك.
ويسرا كانت بتسمع الكلام وتفرح، لدرجة إنها بدأت تتعامل معايا كأني واحدة من الخدم عندها. في يوم دخلت المطبخ وقالت
سعاد، أنا عايزة أعمل عزومة لصاحباتي بكرة، وهحتاجك تجهزي أكل كتير، ونظفي الصالة كويس، وخلي بالك من الحمام اللي فوق، عشان أنا هقعد معاهم هناك. بصيتلها وقلت
من عيني يا يسرا. ضحكت وقالت
بصراحة أنا كنت خايفة إن وجودي هنا يعمل مشاكل، بس الحمد لله حسن عرف يتصرف، وإنتِ كمان طلعتي أهدى مما كنت متوقعة. ابتسمت وقلت
ربنا يديم الهدوء. ومن يومها بقت تتصرف كأن البيت ملكها، تنقل العفش من مكانه، وتغير ترتيب الأوض، وتختار الأكل اللي يتعمل، وحتى لما كانت صاحباتها بييجوا كانت بتعرفهم على البيت وتقولهم
إحنا أخيرًا استقرينا هنا، وحسن موفرلنا كل حاجة. كنت بسمع وأسكت، لحد ما في يوم دخلت عليا الأوضة وقالت
سعاد، أنا عايزاكي تنقلي حاجتك من الدولاب الكبير، عشان محتاجة مساحة لفساتيني. بصيتلها وقلت
حاضر. اتصدمت من هدوئي وقالت
بجد؟ يعني مش هتزعلي؟ أزعل ليه؟ إنتِ أدرى باحتياجاتك.
خرجت وهي مبتسمة، وأنا استنيت لحد ما الباب اتقفل، وبعدها طلعت تليفوني واتصلت بمحامي كنت أخدت رقمه من واحدة صاحبتي. كنت محتاجة أعرف حقوقي القانونية، خصوصًا إن حسن كان فاكر إن مجرد إنه يرفض يطلقني يبقى يقدر يعلقني العمر كله
