جنيهات ذهب متصنعه من النحاس الأصفر

وكأنه فيلم سينمائى بوليسي طويل.. أبطاله 6 أشخاص منهم 4 مسجلين خطـ.ر في عالم الجريـ.مة و2 على الله حكايتهم

العـ.صابة دي كانت بتجيب معدن النحاس، وتصهره في درجات حرارة عالية داخل ورشة صغيرة مأجورة في مدينة السلام وتصبه في إسطمبات على شكل جنيهات وسبائك ذهبية.

لحد هنا والموضوع عادي.. السحر كله بقى في المادة الكيميائية اللي كانوا بيدهنوا بيها النحاس.. المادة دى بتدي النحاس بريق ولمعان يخليك تبص للجنيهات تلاقيها بتزغلل عينك وتقولك يا أرض اتهدي ما عليكي قدي.. أنا ذهب عيار 24

شوية النصابين دول عارفين إن المواطن دلوقتي بقى واعي وبيخاف يشتري مشغولات ذهبية زى الخواتم والغوايش والسلاسل علشان مايخسرش فلوس المصنوعيه وبيروح يشتري الجنيهات الذهبية والسبائك “المغلفة” الجاهزة بتاعة الشركات الكبيرة علشان يضمن نقاوته.

فكانوا بيروحوا يشتروا جنيهات ذهب أصلية ومغلفة من الشركات العالمية اللى ليها إسمها ووزنها فى السوق.. وبطرق فنية دقيقة جداً يفتحوا الغلاف من غير ما يتبهدل، ويشفطوا الجنيه الأصلي، ويحطوا مكانه

“جنيه النحاس المغـ.شوش”، ويرجعوا يقفلوا الغلاف تاني كأنه لم يُمس

وعلشان العملية تبقى محبوكه والمواطن يطمن، زوروا فواتير وعملوا “أكلاشيهات وأختام” منسوبة لأشهر محلات الصاغة والمصوغات، علشان اللي يشتري ياخد فاتورة مختومة ويتهيأله إنه شاري من مصدر رسمي ومشروع

لكن ليس دائما تأتى الرياح بما تشتهى السفن.. ففي عز ما العـ.صابة عمالة تعد في الملايين وتضحك على الطمـ.اعين اللى بيجروا ورا أى حاجه تكون أرخص حبتين وعلشان مانظلـ.مهمش برضو ساعات بيكون فيهم ناس طيبين

بيثقوا فى أى حد وكمان بيكون فى ناس مغفـ.لين من اللى بيشتروا وينضحك عليهم.. المهم إن العـ.صابة دى جمعت ملايين من بيع النحاس.. قصدى بيع سبائك وجنيهات الذهب المغـ.شوشه

لما الذهب سعره زاد واللى اشترى راح علشان يبيع ويكسب إكتشفوا إن الذهب بتاعهم دا مش دهب.. دا كله نحاس وإنهم اتنصـ.ب عليهم فابتدت البلاغات والمحاضر تكتر وهنا جاء دور رجال الداخليه

ابتدت عيون قطاع الأمن العام تراقب وتجمع في المعلومات والتحريات فى صمت تام وبكل هدوء حتى تمكنت من جمع كل خيوط العملية.. وفى كمين محكم، تم ضبط الـ 6 متهـ.مين بنطاق مديرية أمن الغربية

وعلى طريقة فتشنى فتش بتاعت إسماعيل ياسين فى فيلم إبن حميدو حاول الجـ.ناة إنكار فعلتهم.. لكن الداخليه هذه المره لم تتركهم كما فعل عسكرى الكمين مع إبن

حميدو.. الداخليه المرادى قالت لهم أيوه هنفتش وهنفتش

وبعد التفتيش الدقيق تم ضبط 63 جنيه ذهب مقلد كلهم عباره عن نحاس مدهون بالأوهام ذات اللون الأصفر اللامع.. وكمان مسكوا معاهم 5 سبائك ذهبية مقلدة مختلفة الأوزان و 18 غلاف فارغ لشركات ذهب شهيرة جاهزة للتعبئة.. بالإضافة إلى كميات من المشغولات الذهبية الحقيقية لزوم التمويه وإثبات المصداقية أمام الزبون

وطبعا مسكوا معاهم مبالغ مالية ضخمة بالملايين و 10 هواتف محمولة.

وتم ضبط أدوات التصنيع و 6 فواتير مـ.زورة جاهزة للبيع.

وبالتالى لا حجة للإنكار ولا مكان للهروب فوقف المتهمون أمام رجال المباحث مُنكسرين ومُنكسى الرؤوس واعترفوا بكافة تفاصيل السيناريو السابق، وأقروا إنهم نفذوا 6 وقائع بنفس الأسلوب الشيـ.طاني ده، وعلى الفور تم إحالتهم للنيابة العامة. وصورتهم أصبحت منورة صفحة الداخليه جنب صور أمثالهم من النصـ.ابين والمـ.زورين والقـ.تلة والمجـ.رمين.. حيث وجهت الداخلية فى بيانها نصيحة لكل المواطنين:

“بلاش جري ورا العروض الوهـ.مية، ولا تشتروا مشغولات ذهبية أو سبائك إلا من الأماكن الموثوقة المعتمدة اللي ليها اسم وتاريخ في السوق”.. لأن بريق الذهب ساعات بيبهر العين، ويخلينا ما نشوفش النحاس المستخبي جوه الغلاف!