
“محمود… هي فين؟”
“ما أعرفش، وحتى لو اعرف مش هقولك. سارة ويوسف في أمان، وإنت لازم تروح لدكتور يتعالج يا حسن… علاج نفسي قبل أي حاجة، عشان إنت دمرت نفسك ودمرتنا معاك.”
محمود قفل الخط في وش حسن. حسن ركن العربية على جانب الطريق، وحط راسه على الطارة وبدأ يعيط بصوت عالي، عياط راجل اكتشف إنه في لحظة غل دمر كل حاجة حلوة كانت في إيده.
في المقطم، سارة كانت مسكة إيد يوسف ونازلين على السلم. الشمس كانت مالية الشارع. يوسف بص لسارة وابتسم: “ماما… أنا جائع.”
سارة ضحكت من قلبها، ضحكة صافية كانت غايبة عنها من سنتين كاملين، وطت وپست خده: “من عينيا يا حبيب ماما… هناكل أحلى فطور النهاردة، وبعد كده نروح نعمل ورق مدرستك الجديدة.”
مشيوا في الشارع وسط الناس، خطوات سارة كانت ثابته، وإيدها ضاغطة على إيد ابنها… كانت عارفة إن الطريق مش هيكون سهل، بس كانت عارفة كمان إنها كسبت أهم حاجة: حريتها، وكرامتها، وابنها.
عدى شهرين. الشمس كانت طالعة دافية في المقطم. سارة كانت واقفة في صالة الشقة القديمة، الشقة اللي اتغيرت ملامحها تماماً… دهانات جديدة هادية، ورد صناعي بسيط في الأركان، وريحة نضافة. على التربيزة الصغيرة، كانت رصة دفاتر وكراسات رسم، ويوسف قاعد بيلون بكل تركيز وهو بيغني بصوت واطي، لابس زيه المدرسي الجديد.
تليفون سارة رن. بصت للشاشة… “محمود”.
اتنفست بهدوء وردت: “مساء الخير يا محمود.”
صوت محمود جه هادي ومليان احترام: “مساء النور يا سارة. أنا بكلمك بس عشان أبلغك إن كل الإجراءات خلصت. أوراق الخلع اتثبتت رسمياً، وحقك وحق يوسف في التعليم والمصاريف بيوصلك أول كل شهر على الحساب زي ما اتفقنا.”
سارة بصت لشباك البلكونة وابتسمت ابتسامة خفيفة: “شكراً يا محمود… تسلم على كل حاجة عملتها معانا.”
“سارة…” محمود سكت ثواني قبل ما يكمل بنبرة واطية: “أمي بتسأل عليكِ وعلى يوسف كل يوم. هي صحتها تعبت شوية من يوم اللي حصل، بس ما بتفوتش يوم من غير ما تدعيلك وتدعي للولد. لو تحبي في أي وقت تيجوا تزوروها… الباب مفتوح، وهي مش طالبة غير إنها تشوف يوسف بس من بعيد.”
سارة عينها دمعت بوفاء حقيقي للست اللي كانت لها أم في يوم من الأيام، وقالت بنبرة حنونة: “الحاجة فاطمة فوق راسي من فوق يا محمود، وعمرها ما كانت طرف في اللي حصل… هجيب يوسف وأجي أزورها قريب جداً.”
“ربنا يكرم أصلك يا سارة. وبالمناسبة… حسن سافر بره مصر. قدم على شغلة في الخليج ومشي من أسبوعين، ودخل في برنامج علاج نفسي هناك… هو بعت اعتذار مكتوب ليكِ وللولد.”
سارة بلعت ريقها وسكتت ثواني، وحست كأن آخر بقايا الكابوس ده اتبخرت في الهواء.
“ربنا يهديه ويسامحه يا محمود… المهم إنه يبعد ويسبنا نعيش في حالنا.”
قفلت السكة، وحطت التليفون على التربيزة. قربت من يوسف، وطت ورست إيدها على كتفه وهو بيلون. الولد رفع عينه لها، عيون أخويا طارق الراحل كانت بتبص لها بصفاء، وابتسامة بيضاء مالية وشها: “ماما… بصي رسمت إيه!”
سارة بصت في الورقة، لقيت رسمة بسيطة لبيت صغير شباكه مفتوح للشمس، وجواه واحدة ماسكة إيد طفل صغير مكتوب تحتهم بخط معوج: “ماما ويوسف”.
سارة مسكت الرسمة، حضنت يوسف بقوة وهي بتضحك.
كانت فاكرة إن ليلة دخلتها كانت نهاية عالمها، بس اكتشفت إنها كانت مجرد الباب اللي انكسر عشان تخرج منه للحرية. طلعت البلكونة، بصت للسماء الواسعة فوق المقطم، وأول مرة من سنين طويلة… اتنفست بحرية وبدون أي سر يسحبها لتحت.
تمت.
“هذه القصة من وحي خيال الكاتب، وأي تشابه بينها وبين الواقع في الأسماء أو الأحداث هو محض صدفة غير مقصودة.”




