الام العاقر بقلم الكاتبة ريناد يوسف
قصدك ايه يعني بزياداني لحد إهنه.. خلاص ياقناوي فقدت الأمل فيا.. هتنخ لكلام امك واخواتك وتشوفلك وحده غيري تخلفلك العيل اللي نفسك فيه مش وعدتني تصبر عليا ياقناوي مش قولتلي هملي موضوع الخلفه لما ربنا يريدلنا ويدينا من كرمه وفضله.. مش قولتلي ارتاحي
واطمني وولدي مش هياجي من غيرك ياسمره
رد عليا وهو عيشدني عليه ويرجع يدفن دماغه فصدري من تاني والنوبادي كان غرضه يدفن دموعه اللي مقدرش عليهم ونزلوا ڠصب عنه وقال
ودلوك هقولك ارتاحي اكتر ياسمره ولدي لا هياجي منك ولا من غيرك اني مهيكونليش ولاد اصلا اني خلاص من اللي اتحكم عليهم يعيشوا فرادى في الدنيا ويموتوا ويتمحي اثرهم.
لا واد يحيي إسم ولا يحافظ على بيتي مفتوح من بعدي.. ھموت واتنسى وداري تضلم ويسكنها الغريب من بعدي.
شهقت واني عسمع كلامه وضميته لصدري اكتر واني عقوله
ششش بطل خترفه انت كنك سخن وعتخرف كلام ايه اللي عتقوله ديه ومين اللي حطه فدماغك انت كيف الورد وعيالك هيملوا الدنيا ڠصب عن الناس المكيوده اللي عتملا راسك بالافكار السوده عشان يكسروا نفسك.
ديه مش حديت ناس مكيوده ياسمره ديه حديت الحكيم اللي زرته في البندر وكشف عليا وعملي تحاليل وعرف العله اللي بيا..واني معيوب ومقطوع النسل.
الحكيم ديه كداب وتحاليله كدابه زيه متصدقهوشب.. روح لغيره.. وليه تروح من الاساس مالكل عارف ان الخلفه من عدمها دايما عتكون من المره والراجل عمره ماعيكون معيوب..
إسمع ياقناوي.. بكره هتروح البندر تاني واني هروح معاك ونشوفوا حكيم زين وكبير قوي بدال المهبل اللي رحتله ديه وهسمعك بودنك إن العيب مني اني مش منك
ومن الساعادي لوكتها ترفع راسك وتجلي عيونك من سحابة الدموع اللي غيمت عليهم داي وتقوم تاكل معاي وتضحك وتفرفش.. انت سيد الرجاله كلها ومش معيوب عشان دمعك يسيل.
ورحنا بالفعل تاني يوم عالبندر وهناك سألنا علي اكبر
دكتور متخصص في تأخير الحمل ورحناله..
كان فاتح عياده كبيره قوي قوي ومليانه ناس لما هتطق من جنابها.
حجزنا مستعجل ودخلنا وجوه كشف علينا الداكتور.. ابتدا بيا اني وبعد الكشف قالي قومي انتي سليمه ميه في الميه ولو لقيتي تخصيب تحبلي في اللحظه داي.
مفهمتش اغلبية حديته بس اللي فهمته اني صاخ سليم ومن بعدي كشف على جوزي وبعد الكشف طلب منيه تحاليل وراه قناوي التحليل القديم الداكتور معترفش بيه وقال عاوز واحد جديد فقولت لقناوي يعمله تحليك طازه اكيد ديه خرب.
وفعلا قناوي عمل التحليل وعمل اشاعات قاله عليهم الداكتور.. وعلي مايطلعوا اخر النهار خدني قناوي ونزلنا نتمشوا.
كانت داي المره التالته اللي اندلى فيها البندر.. نزلته نوبتين قبل الجواز واني عشتري شواري وادي النوبه التالته.
قعدني على سور الترعه الكبيره واللي مسمينها كرنيش.. جابلي صميط وبيض واشترالي جلاطهايس كريم . كنت فرحانه وعبص حواليا عالناس واضحك واداري وشي واحط يدي علي عيون قناوي كل ماتعدي من قدامنا وحده بتوبها القصير ونسيت تلبس جلابيتها فوقه ورجليها باينه وماشيه بيهم من غير كسوف ولا اختشا.. قولت فعقل بالي الظاهر حريم البندر كلهم نسايين ومعيختشوش.
كنت كل مااعمل إكده قناوي يضحك ضحكه حزينه وكان طول الوكت باصصلي وحاسه إن نفسه يقول حاجه.. فقولتله
قناوي.. قول اللي فنفسك ياقلب سمره ومتكتمش فقلبك.. اني مرتك وبت عمك وسرك وبيرك الغويط واللي مهما ترمي فيه هموم وأسرار ميطفحشي ولا يوري المتشال فقلبه لحد.
اتنهد وقالي هتعملي ايه لما تبان التحاليل وتعرفي اني صوح معجيبش عيال ياسمره
توف من حنكك وبطل كلام خايب ياقناوي انت زي الفل.
طيب افرضي فرض ياسمره افرضي.
ولا حاجه هعمل ايه يعني ديه أمر
الله وانت مخترتش انك تكون إكده هنكملوا حياتنا من غير عيال هتكون انت ولدي واكون اني بتك ونتدلعوا على بعض ونعيشوا حياتنا بالطول بالعرض
بلا عيال وۏجع دماغ وبس ياد وهوس يابت
والواد اللي كبرناه بطلوع الروح هياخدوه الجهاديه ياتري هيعاود ولا له والبت يتجوزها واحد غشيم من عيال عمها مرعي اللي عاملين كيف الحمير دول وكل يوم يضروبها ويرفسها ويشندل عيشتها
وامسك اني فزوبه امه وانت تمسك في مرعي اخوك واسمع ياشرقي وياغربي.. له يابوي خلينا لحالنا احلالنا.
ضحك قناوي ضحكه خفيفه ومسك يدي حبها وقالي وهو لساه ماسك يدي
. عارفك عتهوني علي بس اللي جواكي غير إكده واني من دلوك ياسمره عقولك وهعطيكي وعد يابت عمي انك لو حابه تتطلق..
وقبل مابكمل كنت حاطه يدي علي خاشمه كاتمه باقي حديته ورديت عليه بزعل
اخص عليك ياواد عمي اخص.. تعرف عني اني مش اصيله واني بياعه وابيعك عشان عيل تغور العيال لو مش انت ابوهم وتغور الخلفه لو من راجل غيرك ويغور العمر لو مش هعيشه معاك ياضي عيني.
بصلي وسكت وكان رده علي حديتي حبه تانيه على يدي وبعدها خدني ورحنا علي عيادة الداكتور وكيف ماكان حاسب لقينا.
والتحاليل والاشاعات بينت انه مش هيقدر يخلف واصل لا بعلاج ولا بعمليات ولا حتى بالصبر.
عاودنا واحنا ساكتين وحدا العباره مسكت التحاليل اللي فيده وقطعتهم ورميتهم في الميه وبصيتله وقولتله
هنعاودوا الدار وكيف ماكنا ماشيين هنكملوا اللي تقولي علي حاجه هعملها عشان اشتت تفكيرهم وابقا لساتني عجري عشان الخلفه وبعد سنه ولا تنين نبقوا نبطلوا رميح.. واللي يسألك تقوله إنك كشفتلي واني اللي طلعت معخلفشي
هات العيب فيا ياواد عمي وامشي وسط الناس رافع
راسك وخليهم يقولوا عليك ابن الاصول اللي مفرطش فبت عمه حتي وهي عاقر ومن أصله مش راضي يجيبلها ضره تكيدها.
ايوه ياسمره بس هتتحملي كيف كلام الناس انتي ولا اللي هتعمله وتقوله امي ومعاها خواتي وغير إكده لسه فيكي حيل تتحملي الخۏف والتعب والمعافره سنه وتنين واني خابر إن جتتك طابت ومعادتش متحمله هتشربي تاني وصفات الحنضل اللي عتجيبهالك امي من العطارين كيف سنه وتنين وانتي عتشتكي من معدتك واللقمه بالزول بالعافيه عتتحمليها من ۏجع معدتك هتحمل لجل عيونك واشرب المر ألف مره بس انت متشيلش همي اني هسمع واعدي والحديت معيعلمش في الجته..وۏجع المعده هيروق والخۏف عيتنسي كله بس تاخدني فحضنك اخر الليل.
طيب واني هتحمل كيف اشوفك طول الوكت متلامه علي ذنب مش ذنبك وتسمعي حديت يعلم في القلب حتي لو معلمش في الجته هتحمل كيف اشوف تعبك بعيني وانتي صاخ سليم.
ماقولنا ليكش صالح انت عاد بالحديت وأهله..ولا بالتعب.. اهم حاجه إن اني وانت عارفين اننا ملناش غير بعضنا وباقي الناس تحت رجلينا هي وحديتها.
وعاودنا يومها عالدار. وعدت فتره علينا عنتعاملوا عادي كيف ماكنا لغاية ماأمه صممت اني لازمن انام تحت القطر عشان اخلف ولما لقينا راسها وألف سيف.. فجرنا القنبله اللي غيرت مجرى حياتي وخلت عداوة مرت عمي ليا بقت عالعلن وشنت عليا حرب بكل الاسلحه المتاحه ومن يومها وحياتي اتحولت لچحيم وكنت علي قد مااقدر احاول اني اداريه عن قناوي وابينله إن حياتي ماشيه كيف ماهي ومفيش حاجه اتغيرت واصل وبس كان يمشي ويطلع علي شغله اخد فاسي واهروب اني عالغيط واتدس فيه من حماتي وكلامها اللي يسم البدن واهلك روحي شغل في الارض وفلاحه بس الحلوا إن الارض معتنكرش تعب وأي ضړبة فاس
فيها عتردها بزرعه عفيه ومحصول يفرح العين والكل كان يحسدني عليه.
وعدت الايام وبقت شهور وبعدها سنه وسنتين ومرت عمي تعبت من كتر الكلام والتحريض في جوزي عشان يتجوز اللي تجيبله الواد وسلمت بالأمر الواقع وحتى جوزي لما بطلت كلام وشتيمه فيا ابتدت نفسيته ترتاح وترجعله الضحكه من تاني.. وشغله ابتدا يزيد ويكبر أصله شغال في الحصر والكليمات والتلاليس زكيبه صوف الصوف يعملهم ويندلي البندر يبيعهم للتجار بكميات.. لغاية مافيوم
كنت ماشيه مع ستات البلد زي كل يوم عشان نملا البلاليص من النيل قبل مالشمس تطلع وصهجها يملا الجو والدنيا تقيل علينا الكلام ديه كان بعد صلاة الفجر بحاجه بسيطه.
عبينا دور وتنين وفي التالت كان الضو طلع بصيت عالمعديه اللي كانت جايه من بعيد ومحمله ناس من البر التاني وبصيت للحريم وقولتلهم
يلا يامره همي منك ليها المعديه قربت علينا ومحمله ناس ورجاله غريبه وبياعين هموا قبل ماعين نجسه تقع علينا وتشبع فينا شوف.

